ركز فى الصلاه بأه يا أحمد

الموضوع دا بيتكلم عن واحد بيسرح وهو بيصلى انا عن نفسي

بسرح شويه فى الصلاه بس بحاول قدر المستطاع انى اركز


وانتو ياريت تبعتو وتقولولى بتركزو ولا عاملين زيي انا واحمد بس انا مش زى احمد قوى يعنى ؟

ملحوظه: (( لما تقرأو هتعرفو مين احمد))




ركز ف الصلاه بأه يا احمد

استغفر الله العظيم

إستووا.. إعتدلوا.. إستقيموا يرحمكم الله

الله أكبر


الله أكبر

وبيكلم أحمد نفسه وهو بيصلي ويقول ؟؟؟؟

أحمد ركز بأه في الصلاة وبلاش تسرح

طيب خلاص

إمممم.. هو الراجل اللي جنبي ده صوابع رجليه عاملة كده ليه؟

صباعه الكبير ده كبير أوي

آه بمناسبة الصوابع هي صوابع زينب دي اللي هيا إيه؟

بيتهيألي دي اللي عاملة زي الزلابية

زلابية؟؟ زلابية إيه بس وبتاع إيه

الله أكبر

أحمد ركز ياأحمد

طيب ماأنا مركز أهوه


مركز إيه طيب إنت قريت سورة إيه؟

أنا قريت سورة اللهب شفت بأه أنا مركز إزاي؟

لألأ دي كانت سورة الفيل

سمع الله لمن حمده

ربنا ولك الحمد


أنا جعت

بس مش عارف أفطر إيه النهاردة؟

آه المطعم الجديد اللي كانوا بيتكلموا عنه إمبارح

بيقولوا عليه أكله حلو

بس هو في شارع إيه؟

لما أخلّص الصلاة أتصل بالتليفون أعرف العنوان



الله أكبر

هيا الساعة كام دلوقتي؟

زمانها أربعة وخمسة

على فكرة هيا الساعة التانية الجلد كنت حطيتها فين؟

آه.. ياإما في الدرج ياإما في الدولاب

دولاب ايه بس ياأحمد ركز ياأحمد إنت بتصلي، أستغفر الله


الله اكبر

أهوه أنا مركز أهوه

إنظر لمكان السجود وركز في الأيات اللي بيقولها الإمام


الله أكبر

الشيطان ده أعوذ بالله بيخلي الواحد يسرح

مش هو الشيطان بيتسلسل في رمضان

يعني بيتسلسل تلاتين يوم

أيوه بس هو رمضان ده تسعة وعشرين ولا تلاتين؟

هو إبتدى إمتى؟

تعالى نحسبها كده

هو كان يوم السبت في السعودية وفي مصر الأحد

غريبة أوي الحكاية؟

طيب لو واحد على الحدود ورجل بره ورجل جوه يصوم ولامايصومش؟




أحمد.. شفت أهوه إنت رجعت تسرح تاني

الله أكبر

هو إحنا في الركعة الكام؟

يعني هانقوم ولا هانقرأ التشهد؟

لا دي التانية

طيب أقولك

إتأخر شوية وشوف الي جنبك هايقوم يقف ولا يقعد يقرأ التشهد


الله أكبر


أيوه دي الركعة التانية





شفت بأه عشان سعادتك عمال تسرح

لأ خلاص أعوذ بالله من الشيطان الرجيم


الله أكبر


السجادة دي مريحة ولونها حلو

هيا سجادة ولا موكيت

لاموكيت بنسيج السجاد

آه على فكرة إبقى إفتكر تكنس السجادة اللي في البيت بالمكنسة

بس لازم أنضف كيس المكنسة عشان بقالي مده مانضفتوش



الله أكبر


الراجل اللي جنبي ده

رجليه بتزق في رجلي

طيب أحرك رجلي شوية

الله ده بيلزقها فيا تاني

أستغفر الله

الله أكبر

فيه صوت موبايل

الناس دي ليه مش بتقفل الموبايل ساعة الصلاة

مش عارفين ان ممكن ده يخلي الواحد مايركزش في الصلاة

مع إن فيه يافطة محطوطة على الباب مكتوب عليها

إغلق الجوال من فضلك

وعليها صورة موبايل عليه علامة إكس

بس هو الموبايل ده كان نوعه إيه؟

بيتهيألي سيمنس

هيا إيه الرنة دي؟

آه أنا عايز أبقى أغير الرنة

فاكر الموضوع اللي كتبته عن رنات الموبايل


الله أكبر

الراجل اللي جنبي ده عمال يتحرك كتير

أستغفر الله مافيش خشوع خالص

أنا أهوه مش باتحرك


السلام عليكم ورحمة الله

السلام عليكم ورحمة الله


إيه هيا الصلاة خلصت ؟

السلام عليكم ورحمة الله

السلام عليكم ورحمة الله

أستغفر الله العظيم


يارب مايكون حد فينا زي احمد دة

اللهم تقبل منا وتب علينا وارحمنا انك انت

التواب الرحيم


- - - - - - -

جزاك الله خير
وان شاء الله محدش يبقى زي احمد وكلنا نركز ف الصلاة
ودي ووردي

اتمنى بجد ان ميكونش فى حد زى احمد وانا هركز اكتر هحاول يعنى

جزاك الله خيرا

فعلا يا جماعه ناس بتسرح كتير ف الصلا

موش عيب على فكرة انك تسرح

لكن لازم تحاول الخشوع ف الصلا على قدر المستطاع

ركز فى السورة اللى بتقرأها

انظر الى مكان السجود

حاول ما تشغلش تفكيرك باى شىء تانى

ادعى ربنا كتير ف الصلا والاستغفار كمان

ينى ما تحاولش تفكر فى اى حاجه تانيه الا لما تفرغ من الصلا

و جزاك الله خيرا

نايس توبك


جزاك الله خيرا

شكرا على المورور ياجماعه واتمنى اقدر افيدكم بمواضيع تانيه

جزاكى الله كل الخير
الموضوع ده بيحصل كتير ربنا يهدينا اجمعين
ان شاء الله هنزل موضوع عن كيفية الخشوع فى الصلاة

جزاك الله كل خير
وبجد موضوع مهم جدا لماس كتير بيسرحو في الصلاه وياريت الكل يتعلم من الموضوع الجامد ده

معلش انى اتأخرت فى الرد اصل الكومبيوتر كان بايظ

المهم شكرا لمروركم جميعا وياريت اكون افادتكم

جزاك الله خير بجد

ربنل مايجعلنا زى احمد

الله يرحم الناس اللى أول ما الصلاة بتبدا تلاقى كل واحد منهم فتح التليفزيون الخاص بيه ويقفله اول ما الامام يقول السلام عليكم ورحمة الله وبركاته

*ألم يأن للذين آمنو ان تخشع قلوبهم لذكر للـــــــــــــــــــــــه وما نزل من الحق *


__________________


جزاكم الله كل خير