قصائد للشاعر المصري الكبير : أحمد فؤاد نجم

حلاويلا

حلاويلا يا حلاويلا .. يا خسارة يا حول الله


ده الثوري النوري الكلمنجي .. هلاب الدين الشفطنجي
قاعد في الصف الاكلنجي ... شكلاطة و كاراميلا ..


يتمركس بعض الايام ... يتمسلم بعض الايام
و يصاحب كل الحكام .. و بسطعشر ملة ..


حلاويلا يا حلاويلا .. يا خسارة يا حول الله


يا حلاولو لو شفتو زمان .. مهموم بقضايا الانسان
بيتكتك لتقول بركان .. و لا بوتجاز و لا حلة ..


حلاويلا يا حلاويلا .. يا خسارة يا حول الله


اش حالك يا قريب اليوم .. اش جاب التفاح للدوم
و اش جاب الغرفة ببدروم ... للعربية و فيلا


حلاويلا يا حلاويلا .. يا خسارة يا حول الله


جرانين و منابر و ادارة .. و معلق طلبة و زمارة
يعطل أهو بيسلك يابا .. و يجيبوا المنافيلا


حلاويلا يا حلاويلا .. يا خسارة يا حول الله


دا ترستق هلاب الدين .. بقى عاقل جداً و رزين
و يعن عند المجانين .. إن عشنا و متنا بعلة


حلاويلا يا حلاويلا .. يا خسارة يا حول الله


========================

جيفارا مات

شعر : أحمد فؤاد نجم

غناء : الشيخ إمام

-------------------------------------

جيفارا مات

جيفارا مات

آخر خبر فِ الراديوهات

و فِ الكنايس

و الجوامع

و فِ الحواري

و الشوارع

و عَ القهاوي و َ البارات

جيفارا مات

جيفارا مات

و اتمد حبل الداردشة و التعليقات

********

مات المناضل المثال

يا ميت خسارة عَ الرجال

مات الجدع فوق مدفعه جوّه الغابات

جسّد نضاله بمصرعه

و من سُكات

لا طبالين يفرقعوا

و لا اعلانات



********

ما رأيكم دام عزكم

يا انتيكات

يا غرقانين

فِ المأكولات و الملبوسات

يا دفيانين

و مولعين الدفايات

يا محفلطين (1)

يا ملمّعين يا جيمسنات

يا بتوع نضال آخر زمن

ف العوامات

ما رأيكم دام عزّكم

جيفارا مات

لا طنطنة

و لا شنشنة

و لا إعلامات و استعلامات

عيني عليه ساعة القضا

من غير رفاقه تودّعه

يطلع أنينه للفضا

يزعق و لا مين يسمعه

يمكن صرخ من الألم

من لسعة النار فِ الحشا

يمكن ضحك

أو ابتسم

أو ارتعش

أو انتشى

يمكن لفظ آخر نفس كلمة وداع

لَجل الجياع (2)

يمكن وصية للي حاضنين القضية

بالصراع

صور كتير ملو الخيال

و ألف مليون إحتمال

لكن أكيد و لا جدال

جيفارا مات موتة رجال



*******

يا شغالين و محرومين

يا مسلسلين (3)

رجلين و راس

خلاص خلاص

مالكوش خلاص

غير البنادق و الرصاص

دا منطق العصر سعيد

عصر الزنوج و الامريكان

الكلمة للنار و الحديد

و العدل أخرس أو جبان

صرخة جيفارا يا عبيد

في أي موطن أو مكان

ما فيش بديل

ما فبش مناص

يا تجهّزو جيش الخلاص

يا تقولو عَ العالم

خلاص


1968

---------------------------------------

يا عرب ( باللهجة المصرية )

كلمات الشاعر المصري أحمد فؤاد نجم .. و غناء الشيخ إمام



يا عرب .. يا عرب .. يا عرب في أي مصر

يا عرب .. يا عرب .. اسمعوا صوت شعب مصر

أحفظوا لمصر المكان .. و احنا عالعهد اللي كان

مصر أوفى من الزمان ..
و انتو عارفين شعب مصر

يا عرب يا عرب يا أهل مصر

----------------------------

اللي خانوا العهد بينا .. و استباحوا كل حاجة

و استهانوا بالعروبة .. و استكانوا للخواجة

مستحيل حيكونوا منا .. نحنا حاجة و هما حاجة

هما باعوا الجلابية .. و الوطن و البندقية

و ا حنا أصحاب القضية ..

احنا ما بنبيعش مصر

يا عرب يا عرب يا أهل مصر
----------------------------

يطلع الدجال بزيفو .. يملا وادي النيل ضباب

ينزل الجلاد بسيفو ... يزرع الموت و الخراب

يطول الليل زي كيفو .... الصباح له ألف باب

و احنا بوصلتنا بإيدينا .. ما تخافوش من الليل علينا

مهما غبتو عن عينينا ..

انتو جوا بقلب مصر

يا عرب يا عرب يا أهل مصر

-------------------------

سينا و لا .. يافا و لا .. حيفا ولا ... دير ياسين

اسألوا الشمس اللي هالة .. عللي صحيوا مبدرين

يزرعوها نور و غلة .. دول جدودنا و لا مين ؟

حقنا و حتما ً يُعاد .. بس لو بانت سعاد

و البيان ده لوه معاد ...

و المعاد حيكون في مصر

يا عرب يا عرب يا أهل مصر



========================




اتجمعوا العشاق

اتجمعوا العشاق في سجن القلعة ... اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة .... مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر

...............

تجمعوا و العشق نار في الدم ..... نار تحرق الجوع و الدموع و الهم

نار تشتعل لما القدم ينضم .... لما الايادي تفور في لم اللحم

و اللحم متنتور في رملة سينا .... و الكدب بيحجز على أيادينا

قدم العدو غارسة في لحم ترابي ... و الكدب عشش مخبرين على بابي

و المخبرين خارجين كلاب سعرانة ... بيجمعوا العشاق في الزنزانة

...............

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر


========================





غابة

غابة كلابها ديابــــا ... و نازلين في الناس هـم
و اللي ينام في الغابة ... رح يتاكل هــــــــم
و اللي يدور وشـــــو ... في غمضة عين يتهــــــم


و اللي يغيب عن جحرو .. لاجل القوت و المم
يتخان من ورا ظهرو ... او يتاخد خم
غابة بتاكل ميتة ... غابة بتشرب دم


غابة كلابها ديابا ... نازلين بالناس هم
غابة و ناسها غلابة .. خيخة لا ناب و لا فم
متكلين عالصدفة .... متاكلين بالهم


و احنا يا ملح الغابة .. هم يحرك هم
ضايعين و سط ديابا .. مش فاضيين نهتم
فاهمين و بنتغابا ... مش راضيين نتلم



========================

هما مين و إحنا مين ...

كلمات الشاعر : أحمد فؤاد نجم
غناء : الشيخ إمام


هما مين و إ حنا مين .. ؟

هما الأمرا و السلاطين ..

هما المال و الحكم معاهم ..

و إحنا الفقرا المحرومين

حزر فزر شغّـل مخك

شوف مين فينا بيحكم مين ؟!!

..............

إحنا مين و هما مين ..

إحنا الفعلا البنايين

إحنا السنة و إحنا الفرض

إحنا الناس بالطول و العرض

من عافيتنا تقوم الارض ..

و عرقنا يخضر بساتين

حزر فزر شغل مخك

شوف مين فينا بيخدم مين ..؟؟!!

................

هما مين و إحنا مين ؟؟

هما الامرا و السلاطين

هما الفيلا و العربية

و النساوين المتنقية

حيوانات استهلاكية

شغلتهم حشو المصارين

حزر فزر شغل مخك

شوف مين فينا بياكل مين ..؟؟!!!

....................
إحنا مين و هما مين

إحنا قرنفل على ياسمين

إحنا الحرب : حطبها و نارها

و إحنا الجيش اللي يحررها

و إحنا الشهدا بكل مدارها

منكسرين أو منتصرين

حزر فزر شغل مخك

شوف مين فينا بيقتل مين ..؟؟!!!

................


هما مين و إحنا مين

هما الامرا و السلاطين

هما مناظر بالمزيكا

و الزفة و شغل البوليتيكا

و دماغهم طبعاً استيكا

بس البركة بالميازين

حزر .. فزر شغل مخك

شوف مين فينا بيخدع مين ..؟؟؟!!!

.....................

هما مين و إحنا مين

هما الامرا و السلاطين

هما بيلبسوا أخر موضة

و إحنا بنسكن سبعة في أوضة

هما بياكلوا حمام و فراخ

و إحنا الفول دوخنا و داخ

هما بيمشوا بطيارات

و إحنا نموت بالاوتوبيسات

هما حياتهم بامب جميلة

هما فصيلة و إحنا فصيلة


حادي يا بادي يا عبد الهادي

يا اللي عليك قصد الغنوادي ( الغنوة دي أو هذه الاغنية )

لما الشعب يقوم و ينادي

يا إحنا يا هما في الدنيا دي

حزر فزر .. شغل مخك

شوف مين فينا حيغلب مين



========================




دلي الشكارة

دلي الشكارة جنب الشكارة

و اقعد يا حفني ولعلك سيجارة

فكّـر شوية .. بالعيشة دية

إيه القضية إيه العبارة



من صغر سني

شقيان لكني

ما لط سني غير البصارة

....

و دخلت حارة من جوة حارة

و فكل حارة عليت عمارة

و سط المعامل بنا و مناول

بس المقاول كلني بشطارة

و لا خلى صرة و لا لقمة حرة

و العيشة مرة .. أخر مرارة



========================

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى


عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك


ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت


عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف