شعور سخيف انك تحس ان وطنك ضعيف

شعور سخيف
انك تحس ان وطنك ضعيف
صوتك ضعيف رايك ضعيف
انك تبيع قلبك وجسمك
انك تبيع قلمك واسمك
ميجبوش حق الرغيف

يا ساقيه عدى فوقى ودوسى
نصبوا عليا وشحتونى فلوسى
ربطونى فيك حتى ما اتغميت
هما اللى فرحوا وحدى انا اتغميت
انا اللى صاحب البيت عايش بدون لازمة
ولما مرة شكيت ادونى بالجزمة
عدايا انا اللى زارعك دهب بتاكلينى سباخ
ما ان كان ده تقل ودلع بزيادة دلعك باخ
لا شفت فيك دلع ولا ترف
كل اللى فيكى قرف في قرف
كرامتنا متهانه واللقمة باهانه
بتخلفينا ليه لما انتى كرهانا
يعنى ايه تبقى هبة النيل وكل يوم الميه تقطع
يعنى ايه لما اشتكى من الفاتورة يقولوا اشتكى بس تدفع
لما اش الرز ثروة بتتحرق
واما نفط الامه يتسرق
ولما جلادك على ولادك بيبطش
ولما علمك ما يلاقيش يأكل فيطفش
يعنى ايه لما نفتح باب السلام للغزاه
يعنى ايه لما ابقى ماشى فى حالى اتشد اشتباه
ويعنى ايه لما اتحبس 4 سنين
حبس احتياطى
حبس اعتباطى
يعنى ايه مش حاسه بالعمر وغلاوته
بتصبى مر العمر ليه ده انا كنت هوهبلك حلاوته
انا عمرى ما اتأمرت ولا حطيت شروط
يوم كان ما ترسى مركبك أبني شطوط
انا كنت جيشك لما مماليكك باعوكي
وكنت يوسف لما عشتي سنين عجاف
وضلوعي دي اللي كانت ف معركة قادش حموكي
وشفايفي دي اللي مابطلتش هتاف
انا كل شبر ف ارضك اتمرمغت فيه
وكل يوم عشتيه انا اتعذبت بيه
ليه بتكرهيني عيونك السود وايامي اللي فاتت
ما انتيش حبيبتي من النهارده حبيبتي ماتت

كل الكلام اتقال والشعر بقى ماسخ
والصبر علو جبال والظلم شى راسخ
علمونا بالعصاية ورضعونا الخوف رضاعة
علمونا فى المدارس يعنى ايه كلمه قيام
علمونا نخاف من الناظر فيتمنع الكلام
علمونا ازاى نخاف
وازاى نكش
بس
نسيوا يعلمونا الاحترام
فمتزعلوش لما ابقى مسمعش الكلام
مستنى ايه من طفل ربوه بالزعاق
غير المشاكل والخناق
كل اللى قالولك بحبك ده نفاق
وانا لما قلت بحبك ده كان نفاق
الحب يعنى اتنين بيدوا
مش ايد بتدى و600 يهدوا
الحب حاله
الحب مش شعر وقواله
الحب يعنى براح فى قلب العاشقين للمعشوقين
يعنى الغلابه يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى اعيش علشان هدف علشان رساله
يعنى احسب قيمتى فيكى انى مش عايش عواله
يعنى لما اعرق تكافئينى بعداله
الحب حاله
الحب مش قواله
الحب جواكى استحاله