* يرحمك يا امى*

من طرف **samozean** الأحد أغسطس 22, 2010 1:58 pm

يرحمك يا امى
يجعل مسواكى الجنه

برحمة ربنا
وبدعوه صالحه منا

وبعملك الصالح
قبل ما تواجهى الكريم

بدعى يهديكى يا امى
للصراط المستقيم

نسيتى نفسك يا اما وعشتى
حياتك كلها بس عشاننا

لا فى يوم اشتكيتى
لا تعبتى ولا كليتى
ولا حتى جيتى قلتى
انتى مش عاجبك حالنا

ولينا ياما كتير اديتى
وبكل حاجه ليكى ضحيتى
وولادك عمرك ما نسيتى
ولا فكرتى فى نفسك يوم

شهاده يااما وكلمة حق
كان ليكى والله الف حق
وتيجى تاخدى تقولى لا
ويكون نصيبك من الهموم

تقولى لا مستاهلش
طب قولى مين غيرك يستاهل
عمر ما هان زعلنا عليكى
وزعلك كان بيهون بالساهل

بتقولى دايما مش محتاجه
مش عاوزه من الدنيا دى حاجه
ده ولادى عندى كل حاجه
وكاتمه الحزن وقلبك شايل

قلبك طيب عمره ما قسى
وفى دعانا بتخلصى
ممكن ينسى الدنيا بحالها
الا ولادك عمره مانسى

هى الدنيا غريبه كده ليه
ليه دايما تاخد احبابنا
بس قدرنا هنعمل ايه
جينا نفرح الموت جه غلبنا

وحشتنى كلمة تعالى يا ابنى
خليك هنا خليك فى حضنى
دنا كل شئ ممكن يهون
الا بعدك انتى عنى

وحشتنى اوى كلمة يا امى
خدينى بين ايديكى ضمى
ده تعبى لما يزيد عليا
فى حضنك انتى بنسى همى

وحشتنى كلمة عيب يا واد
بطل بقه شغل العناد
تعبت من كتر المناهده
بس من جواكى فرحانه

ولو فكرنا فى يوم نشكيلك
قلبك يا اما بيبقى دليلك
وتجرى وتلمينا حواليكى
وننسى لما نتوه فى عنيكى

نفسى يرجع بيا زمانى
واصحى الاقيكى بتصحينى
والضحكه فى وشك بتقولى
قوم يلا صلى وادعيلى

دنا من يوم منتى سبتينى
والدنيا اسودت فى عيونى
ومبدعيش غير ليكى بالرحمه
وفى حلمى اشوفك وتجيلى

لما كنتى بتوحشينى
كنت بجرى عليكى واضمك
وممشيش غير لما يقولوا
كفايه بقه يا ابنى ارحم امك

دلوقتى لما بتوحشينى
بجرى اجيب صورتك اكلمها
ويعدى بيا شريط سنينى
والذكرى التايهه الملمها

وافضل اتكلم وياكى
واحكى ليكى عن احوالى
واقولك ايه الى جرالى
وتواسينى بنظرة عين

يا اما بجد زهقت كفايه
يا تجينى بجد يا انا اجيلك
دنا كل حلمى ومنايا
فى الجنه اشوفك!
بدعيلك

كان كل يوم بيعدى عليا
كنتى بتبقى جمبى انا فيه
دلوقتى بقى يعدى عليا
وقلبى بيتقطع فيه

والنهارده يوم ميلادك
يعنى كان الكون بيضحك
كلمه يا اما من ولادك
الى منك محنا طرحك

( كل سنه وانتى يا امى فى جنتك
دايما راضيه علينا وفاكرانا بدعوتك
بعدك الدنيا قاسيه وصعبه الحياه علينا
نفسنا فى حضنك يامى وتملى الحياه علينا

بسال فى نفسى كل يوم
اشمعنى انتى الى بعدتى
لكن قدرنا واحنا ياامى
مش بايدنا غير ان ندعى

كانوا زمان بيسالونى
انت ليه بتحب ماما
بنكسف وتقول عيونى
عشان حاجات كتير وياما

الام يعنى حنان وطيبه
وكل حب الدنيا لينا
يعنى بوسه فوق جبينا
لما بتغمض عنينا
تحت رجليها ده جنه
بس لو راضيه علينا
يعنى مهما فيها نعمل
ومهما يكون فينا الى فينا
هو قلب الام اصفى
وعمره ما ادى ضهره لينا

لو فى يوم غلطت فيها
او جرحت وقلبك طاوعك
هى كاتمه الحزن فيها
ومن جواها راضيه عنك

ولو فى يوم احساسها خانها
وراح لسانها يدعى عليك
قلبها بيرد كيده
ويقول بعيد الشر عليك
وتقول ياربى ما تستجبش
ده ذله والانسان ذليل
عمر قلبى ما يطاوعنى
واللهفه دى اكبر دليل

نسالكم الدعااااااااااء

[b][url][/url][code][quote]

من طرف **Dr.zmalekoooooooooooooo** الأحد أغسطس 22, 2010 3:24 pm

ربنا يرحمها ويسكنها فسيح جناته
وانت واخواتك يلهمكو الصبر

هى الدنيا غريبه كده ليه
ليه دايما تاخد احبابنا
بس قدرنا هنعمل ايه
جينا نفرح الموت جه غلبنا

معاك حق

من طرف **samozean** الأحد أغسطس 22, 2010 3:28 pm

ربنا يخليكى يادكتوره

انتى شايفه انى معايا حق ليه؟

من طرف **Dr.zmalekoooooooooooooo** الأحد أغسطس 22, 2010 3:57 pm

عشان دايما الدنيا مش بتدينا السعاده كامله
لازم حاجه تكون ناقصه
الموت هنا انا اعتبرته كلمه معنويه بس مش بمعنى الموت بس
بمعنى البعد الزعل الفراق
اى حاجه
بس بجد نادر قوى قوى لما ناخد السعاده كامله
بس لازم نتغلب على كده بأى حاجه حلوه تفرحنا حتى لو كانت بسيطه
لازم يكون عندنا امل فى بكره
نبعد عن الحزن ونقرب دايما من الفرح
يعنى بدل ما تفكر فى حزنك على مامتك فكر فى اللى هى عملته لربها واللى انت تقدر تعمله عشان ترضيها بعد ماماتها
ووقتها هتكون مبسوط قوى