الابنودي قصيدة .... يامنه

من طرف adnan الإثنين أبريل 27, 2009 2:53 am

والله شبت يا عبد الرُحمان
عجزت يا واد
مسرع؟
ميتي و كيف؟
عاد اللي يعجز في بلاده
غير اللي يعجز ضيف
هلكوك النسوان
شفتك مره في التلفزيون
ومره وروني صورتك في الجورنال
قلت: كبر عبد الرحمان
أمال أنا علي كده مت بقالي ميت حول
والله خايفه يا وليدي القعده لتطول
مات الشيخ محمود
وماتت فاطنه أب قنديل
واتباع كرم اب غبان
وانا لسه حيه
وباين حاحيا كمان و كمان
عشت كتير
عشت لحد ما شفتك عجزت يا عبد الرحمان

وقالولي خلفت
وانت عجوز خلفت؟؟
وبنات؟؟
أمال كنت بتعمل ايه
طيلة العمر اللي فات
دلوقت ما فقت
وجايبهم دلوك تعمل بيهم إيه؟؟
علي كل
اهي ريحه من ريحتك ع الأرض
يونسوا بعض
ماشي يا عبد الرحمان
اهو عشنا و طولنا منك بصه و شمه
دلوك بس ما فكرت في يامنه و قلت: يا عمّه؟؟
حبيبي انت يا عبد الرحمان
والله حبيبي و تتحب
علي قد ما سارقاك الغربه
لكن ليك قلب
مش زي ولاد الكلب
اللي نسيونا زمان

حلوه مراتك و عويلاتك
وألا شبهنا؟؟
سميتهم إيه؟؟
قالولي: ايه و نور
ما عارفش تجيبلك حتة واد؟؟
والّل أقولك:
يعني اللي جبناهم..
نفعونا في الدنيا بإيه
غيرشي الانسان مغرور
ولسه يامنه حاتعيش و حاتلبس
لما جايبلي قطيفه وكستور؟
كنت اديتهوملي فلوس
اشتري للركبه دهان
آباي.مامجلع قوي يا عبد الرحمان

طب ده انا ليا ست سنين
مزروعه ف ضهر الباب
لم طلّوا عليا احبه و لا اغراب
خليفهم
ينفعوا
أعملهم اكفان

كرمش وشي
فاكر يامنه و فاكر الوش
اوعي تصدقها الدنيا
غش ف غش
إن جاك الموت يا وليدي
موت علي طول
اللي اتخطفوا فضلوا احباب
صاحيين في القلب
واللي ماتوا حته حته
ونشفوا وهم حيين
ختي سلامو عليكم مش بتعدي
من بره الأعتاب

اول مايجيك الموت افتح
اول ما ينادي عليك اجلح
انت الكسبان
اوعي تحسبها حساب
بلا واد بلا بت
ده زمن يوم ما يُصدق
كداب....
سيبهالهم بالحال و المال و انفد
اوعي تبص وراك
الورث تراب
وحيطان الأيام طين
وعيالك بيك مش بيك عايشين

يوووووه يا رمان
مشوار طولان
واللي يطوله يوم عن يومه يا حبيبي
يبقي حمار
الدوا عاوزاه لوجيعة الركبه
مش لطوالة العمر
اوعي تصدق الوانها صفر و حمر

مش كنت جميله ياواد
مش كنت و كنت
وجدعه تخاف منها الرجال
لكن فين شفتوني
كنتوا عيال

بناتي رضيه و نجيه ماتوا وراحوا
وانا اللي قعدت
كيب يا زمان
اوعي تعيش يوم بعد عيالك
اوعي يا عبد الرحمان
في الدنيا وجع و هموم اشكال و الوان
الناس ما بتعرفهاش
اوعرهم لو حتعيش
بعد عيالك ما تموت
ساعتها بس
حتعرف إيه هو الموت

اول ما يجي لك نط

لسه بتحكي لهم بحري حكاية
قاطنه و حراجي القط

آباي..ماكنت شقي و عقريت
من دون كل الولدات
كنت مخالف براوي
وكنت مخبي في عينيك السحراوي
تمللي حاجات

زي الحدايه
تحوي ع الحاجه وتطير
من صغرك بضوافر واعره و مناقير
بس ماكنتش كداب
واديني استنيت في الدنيا
لما شعرك شاب

قدم البيت
اتهدت قبله بيوت و بيوت
واصيل هوّه
مستنيني لمّا اموت

حاتيجي العيد الجاي
واذا جيت..
حاتجيني لجاي
وحتشرب مع يامنه الشاي؟؟

حاجي يا عمّه و جيت
لا لقيت يامنه...ولا البيت